शिमला, २१ फेब्रुवारी २०२५
हिमाचल सरकारने सरकारी महिला कर्मचाऱ्यांसाठी संवेदनशील पाऊल उचलले आहे. मुख्यमंत्री सुखविंदर सिंह सुक्खू यांच्या नेतृत्वाखाली नवजात अपत्य गमावलेल्या मातांसाठी ६० दिवसांची सवेतन रजा मंजूर करण्यात आली आहे.
सध्या ज्या महिला कर्मचाऱ्यांची दोनपेक्षा कमी जीवित अपत्ये आहेत, त्यांना प्रसूतीसाठी १८० दिवसांची सवेतन रजा मिळते. मात्र, नवजात अपत्य गमावल्यामुळे होणारा मानसिक आघात आणि शारीरिक वेदना लक्षात घेऊन सरकारने ही विशेष सवेतन रजा जाहीर केली आहे. या निर्णयामुळे मातांना भावनिक आणि शारीरिकरीत्या सावरण्यासाठी आवश्यक वेळ मिळणार आहे.
ही विशेष रजा केवळ अधिकृत रुग्णालयातील प्रसूतीसाठी लागू असेल. यामुळे मातांना या कठीण काळात मानसिक आणि शारीरिक स्थैर्य मिळण्यास मदत होईल. हा निर्णय मातांच्या भावनांचा विचार करणारा आहे. यामुळे कार्यस्थळी अधिक सहानुभूतीपूर्ण आणि समतोल वातावरण निर्माण होईल, अशी अपेक्षा व्यक्त केली जात आहे.
राज्य मंत्रिमंडळाच्या अलीकडील बैठकीत या धोरणाला मंजुरी देण्यात आली. तसेच, १० मार्च ते २८ मार्च २०२५ या कालावधीत विधानसभेचे अर्थसंकल्पीय अधिवेशन घेण्याची शिफारसही करण्यात आली आहे. या निर्णयाचे विविध स्तरांवर स्वागत होत आहे आणि इतर राज्यांनीही अशीच पावले उचलावीत, अशी अपेक्षा व्यक्त केली जात आहे.