पुणे, २ जानेवारी २०२५:
महात्मा जोतिराव फुले आणि सावित्रीबाई फुले यांनी १ जानेवारी १८४८ रोजी भारतातील पहिली मुलींची शाळा सुरू केली. या ऐतिहासिक घटनेच्या स्मरणार्थ भिडे वाड्यातून फुले वाड्यापर्यंत भव्य शोभायात्रा काढण्यात आली. माळी महासंघाच्या वतीने आयोजित या शोभायात्रेत मोठ्या संख्येने पुणेकर सहभागी झाले.
शिक्षण हाच खरा बदल घडवतो, हा संदेश देण्यासाठी नववर्षाच्या पहिल्याच दिवशी हा उपक्रम राबवण्यात आला. शोभायात्रेत ढोल-ताशांच्या गजरात शालेय विद्यार्थ्यांनी उत्साहाने सहभाग घेतला. विविध चौकांमध्ये फुलांचा वर्षाव करण्यात आला.
कार्यक्रमात आमदार हेमंत रासणे, माळी महासंघाचे राष्ट्रीय अध्यक्ष विनीत ठाकरे यांसह अनेक मान्यवर उपस्थित होते. स्थानिक कार्यकर्त्यांनी या उपक्रमाच्या यशस्वी आयोजनात मोलाचे योगदान दिले.
“फुलेंच्या विचारांचा प्रसार समाजाच्या प्रगतीसाठी महत्त्वाचा आहे. शिक्षणक्रांतीचा संदेश पिढ्यान्‌पिढ्या पोहोचवण्यासाठी असे उपक्रम गरजेचे आहेत.”
असे सामाजिक कार्यकर्ते राजेश शिंदे यांनी नमूद केले.
शिक्षण हीच खरी क्रांती असल्याचा संदेश देत, ही शोभायात्रा फुलेंच्या सामाजिक कार्याला अभिवादन करणारी ठरली.