अकोला, २७ जानेवारी २०२५
राज्य व सेवा कर विभागाने अकोला आणि अमरावती जिल्ह्यातील खासगी कोचिंग क्लासेसवर मोठी कारवाई करत नोंदणी न केलेल्या ४७ संस्थांकडून दीड कोटी रुपये कर आणि दंड वसूल केला आहे.
शासकीय मान्यता प्राप्त शैक्षणिक संस्थांना जीएसटीपासून सूट असली, तरी इतर शैक्षणिक सेवा करपात्र आहेत. अनेक कोचिंग क्लासेस आणि त्यांच्या संचालकांनी जीएसटीच्या नियमांचे उल्लंघन केल्याचे कर विभागाच्या तपासणीत स्पष्ट झाले आहे.
या कारवाईदरम्यान अकोला आणि अमरावतीतील अनेक कोचिंग संस्थांची चौकशी करण्यात आली. उल्लंघन करणाऱ्या संस्थांवर दंडात्मक कारवाई करत त्यांच्याकडून मोठ्या प्रमाणावर कर वसूल करण्यात आला आहे.
राज्यकर सहआयुक्त संजय पोखरकर यांनी स्पष्ट इशारा दिला आहे की, जीएसटी कायद्याचे पालन न करणाऱ्या संस्थांची मालमत्ता जप्त केली जाऊ शकते तसेच त्यांच्या बँक खात्यांवरही कारवाई होऊ शकते.
जीएसटीबाबत जागृतीसाठी विशेष कार्यशाळा
कर विभागाने ६ फेब्रुवारी २०२५ रोजी एक विशेष कार्यशाळा आयोजित केली आहे. यामध्ये जीएसटी कायद्याची सविस्तर माहिती विद्यार्थ्यांना व संस्थांना दिली जाईल.
विभागाने दिलेल्या सूचनेनुसार प्रत्येक खासगी कोचिंग संस्थेला जीएसटी नोंदणी अनिवार्य करण्यात आली आहे. नियमांचे पालन न केल्यास दंडासह कर वसुलीला सामोरे जावे लागेल.
ही कारवाई राज्यभरातील कोचिंग क्लासेससाठी धडा ठरेल, असे कर विभागाच्या अधिकाऱ्यांनी सांगितले आहे.