आपली पीएमपीएमएल’चे बनावट ॲप

प्रवाशांची फसवणूक; पोलिसांकडे तक्रार

पुणे,२४ फेब्रुवारी २०२५

पुणे महानगर परिवहन महामंडळाने (पीएमपीएमएल) प्रवाशांच्या सोयीसाठी ‘आपली पीएमपीएमएल’ हे ॲप्लिकेशन सुरू केले. काही अज्ञात व्यक्तींनी त्यासारखेच बनावट ॲप तयार केले आहे. या बनावट ॲपद्वारे नागरिकांची आर्थिक फसवणूक केली जात आहे. बनावट ॲप अजूनही सुरू असल्याने सायबर पोलीस ठाण्यात तक्रार दाखल करण्यात आली आहे. नागरिकांनी अधिकृत ॲपचाच वापर करण्याचे आवाहन ‘पीएमपी’ प्रशासनाने केले आहे.

फसवणुकीची पद्धत

• हे बनावट ॲप डाउनलोड केल्यानंतर, वापरकर्त्यांकडून त्यांच्या वैयक्तिक माहितीची मागणी केली जाते.
• काही प्रकरणांमध्ये, बँक डिटेल्स, OTP, किंवा UPI माहिती घेतली जात आहे.
• हे ॲप मॅलवेअर किंवा डेटा चोरीसाठी वापरले जात असल्याचा संशय आहे.

‘पीएमपी’ प्रशासनाची पुढील कृती

• अधिकृत प्ले स्टोअर आणि ॲप स्टोअरवरून फसवे ॲप हटवण्यासाठी गुगल आणि ॲपलला तक्रार करण्यात आली आहे.
• सायबर पोलिसांकडून अशा प्रकारच्या फसव्या जाहिराती रोखण्यासाठी विशेष पथक स्थापन केले आहे.

ऑनलाइन तिकिट बुकिंगचा नियमित वापर करणारे काही प्रवासी या बनावट ॲपमुळे चिंतेत आले आहेत. महाविद्यालयीन विद्यार्थी सुरेश शिंदे म्हणाले,

“मी सहसा ऑनलाइन तिकीट काढतो, पण या बनावट ॲपचा  प्रकारसमोर  आल्यानंतर आता  ऑनलाइन  पेमेंट  करायला  भीती  वाटते.”

अशा परिस्थितीत पीएमपीएमएलने अधिक सुरक्षित पर्याय आणि जनजागृती मोहिम राबवावी, अशी मागणी प्रवाशांकडून होत आहे.

नागरिकांसाठी सतर्कता सूचना

• फसव्या लिंक्सवर क्लिक करू नका: पीएमपी प्रशासनाने स्पष्ट केले आहे की, कोणत्याही सोशल मीडियावर येणाऱ्या जाहिरातींवर क्लिक करून थेट ॲप डाउनलोड करू नये.
• अधिकृत संकेतस्थळ तपासा: प्रवाशांनी फक्त पीएमपीएमएलच्या अधिकृत संकेतस्थळावरून किंवा Google Play / Apple App Store मधूनच ॲप डाउनलोड करावे.
• संशयास्पद माहिती रिपोर्ट करा: पीएमपीएमएल किंवा सायबर पोलिसांना अशा फसव्या जाहिरातींबाबत माहिती द्या.

फसवणुकीचा संभाव्य परिणाम

• प्रवाशांच्या बँक खात्यातून पैसे काढण्याच्या घटना समोर येण्याची शक्यता.
• वैयक्तिक माहितीचा दुरुपयोग करून ऑनलाइन फसवणुकीच्या घटना घडू शकतात.
• पीएमपीएमएल ब्रँडवर होणाऱ्या बदनामीचा धोका.

पुणे शहरातील वाहतूक समस्या लक्षात घेऊन स्थानिक प्रशासनाने या फसवणुकीवर अधिक कठोर उपाययोजना कराव्यात, अशी मागणी काही लोकप्रतिनिधींनी केली आहे.

पुढील काय?

• पुणे सायबर पोलिसांकडून तपास सुरू असून, लवकरच दोषींवर कठोर कारवाई केली जाईल.
• प्रवाशांनी कोणतीही फसवणूक झाल्यास तातडीने सायबर पोलीस ठाण्यात संपर्क साधावा.
• पीएमपीएमएल प्रशासनाने नागरिकांना जागरूक करण्यासाठी अधिकृत सोशल मीडिया आणि संकेतस्थळांवर सूचना प्रसिद्ध करण्यास सुरुवात केली आहे.

या गंभीर विषयावर पुढील अपडेट्स लवकरच दिले जातील. प्रवाशांनी सावध राहावे आणि फसवणुकीपासून स्वतःचे संरक्षण करावे.